A Biblioteca Nós organiza un mes de xullo con actividades infantís, exposicións e propostas culturais
A Biblioteca Nós renovará durante o mes de xullo a súa programación de actividades adaptándoa ao período estival, cunha proposta centrada principalmente no público infantil de entre 6 e 12 anos, ao tempo que continuará mantendo exposicións e centros de interese xa presentes nas súas instalacións. Entre os contidos que seguirán tendo presenza durante estas semanas tamén se mantén o espazo dedicado á realidade do pobo palestino.
No apartado expositivo, o vestíbulo da biblioteca acolle a mostra 'Manuel Chamoso Lamas na mirada', unha iniciativa resultado dun ano de traballo desenvolvido por dous grupos de estudantes do IES Manuel Chamoso Lamas do Carballiño.
A exposición estrutúrase en dúas propostas complementarias. Unha delas céntrase no traballo de investigación arqueolóxica e escavación no que participou e, nalgúns casos, dirixiu o intelectual de Moldes, elaborada por alumnado de 2º de Bacharelato da materia de Historia e Xeografía de Galicia. A segunda realiza un percorrido por distintos espazos patrimoniais destacados das comarcas do Ribeiro e do Carballiño, lugares xa retratados anteriormente por Manuel Chamoso, co obxectivo de mostrar mediante imaxes o seu estado actual. Esta reinterpretación visual foi realizada por estudantes de 3º da ESO da materia Proxecto Competencial Fotografía.
No desenvolvemento deste proxecto participaron un total de seis docentes e 22 alumnos. A exposición poderá visitarse ata o 5 de setembro no vestíbulo da biblioteca, en horario de luns a venres de 8.30 a 14.30 horas durante os meses de xullo e agosto.
Outra das propostas presentes no espazo expositivo é 'Non esquezas a Palestina', unha mostra formada por películas, novelas e outros materiais sobre a cultura, a historia e a situación actual do pobo palestino. O espazo inclúe documentos dispoñibles para préstamo e paneis informativos.
No Espazo Xove desenvolverase tamén a mostra bibliográfica 'Verán fantástico: retelling para ser feliz'. Nesta edición, a iniciativa céntrase no subxénero do 'retelling', abordando cuestións relacionadas coas súas características, a súa presenza na literatura e o interese que esperta entre o público lector. A mostra permanecerá aberta ata o 4 de setembro.
Tamén no Espazo Xove poderá visitarse durante xullo e agosto a proposta 'Recomendacións do club de lectura de cómic', na que os integrantes do club comparten as súas lecturas favoritas.
Ademais, no primeiro andar da biblioteca instalarase a mostra 'Non hai verán sen aldea', unha selección de obras ambientadas durante a época estival.
En canto ás actividades dirixidas a maiores de 14 anos, a programación inclúe unha proposta integrada no Festival Atlántica. Trátase do roteiro 'Coñecendo un xigante de pedra no corazón de Ourense!', guiado polo director da UNED de Ourense, Jesús Manuel García Díaz, que permitirá realizar un percorrido narrado pola Catedral de Ourense. A actividade será de acceso libre con inscrición previa e prazas limitadas.
A programación infantil estará destinada a nenos e nenas de entre 6 e 12 anos e desenvolverase os martes e xoves ás 11.30 horas. Debido ao número limitado de prazas será necesaria inscrición previa, que poderá formalizarse desde o venres anterior a cada actividade por teléfono ou presencialmente.
Dentro desta programación inclúese a actividade do Festival Atlántica 'Lúa triangular. Nada é imposible', de Jara Ortiz, dirixida a público familiar maior de catro anos.
Os martes celebraranse os obradoiros 'EmbarrArte', centrados na cerámica e previstos para os días 7, 14, 21 e 28 de xullo. As sesións permitirán aprender a elaborar pequenas pezas e terán unha duración aproximada de entre unha hora e unha hora e media.
Pola súa parte, os xoves estarán reservados para propostas vinculadas ao xogo e á creatividade. O día 9 de xullo desenvolverase un obradoiro de xogos de mesa con Alba Polo, unha actividade que volverá repetirse o día 20 do mesmo mes.
A programación completarase cos 'Obradoiros de creatividade'. A sesión do día 13 estará dedicada ao teatro baixo o título 'Teatro con Chéspir', mentres que o día 27 terá lugar 'Pinceladas de fantasía con Iago García', centrada na ilustración.