A campaña 'Merca no teu comercio' reparte os seus premios entre a clientela de Barbadás
Barbadás acolleu a tarde de onte a entrega de premios da campaña 'Merca no teu comercio', unha acción posta en marcha en colaboración entre a Xunta de Galicia e a Federación Galega de Comercio co fin de impulsar as compras nos negocios de proximidade.
Ao acto asistiu a directora xeral de Traballo Autónomo e Economía Social, Marta Vázquez Guzmán, quen participou no reparto dos galardóns entre os veciños que se sumaron á iniciativa durante o seu período de vixencia no concello, que estivo activa ata o pasado 15 de outubro.
En total, entregáronse 20 tarxetas regalo valoradas en 50 euros cada unha, destinadas á clientela que participou na campaña en Barbadás. Esta cifra repítese en cada un dos concellos polos que pasou a iniciativa, que segue o mesmo esquema de premios alí onde se desenvolve.
A campaña ten como obxectivo reforzar o consumo no comercio de proximidade, centrándose especialmente en localidades sen grandes superficies comerciais abertas. Dende a súa posta en marcha, a iniciativa xa percorreu numerosos puntos de Galicia e logrou a implicación de máis de cincuenta asociacións de comerciantes de distintas zonas, consolidándose como unha ferramenta habitual de apoio ao pequeno comercio local.