A Casa da Mocidade de Allariz foi o escenario da “Convivencia Xadrez 2026”
O alumnado da Escola de Xadrez de Allariz participou esta pasada fin de semana na xornada “Convivencia Xadrez 2026”, celebrada na Casa da Mocidade, nun encontro que reuniu actividade formativa e momentos de convivencia arredor deste deporte.
A iniciativa deixou, segundo se sinala desde a organización, experiencias que van máis alá do taboleiro, destacando o ambiente de compañeirismo e a participación activa dos asistentes. “O alumnado da nosa escola volveu demostrar que, ademais de estratexia, sobra compañeirismo e ganas de compartir”, apuntan desde o Concello.
Desde a escola quíxose agradecer a implicación de todas as persoas participantes, pola súa enerxía e actitude durante as partidas. “Sen ese entusiasmo, estas xornadas non serían o mesmo”, sinalan.