A chuvia pon en aviso amarelo Pontevedra e varias zonas da Coruña e Ourense este martes
A chegada de novas precipitacións levará a activar o aviso amarelo por acumulación de chuvia en distintos puntos de Galicia ao longo deste martes. A provincia de Pontevedra e varias zonas da Coruña e Ourense estarán baixo esta alerta por risco de acumulación de precipitacións.
En concreto, a partir das 12.00 horas activarase o aviso amarelo por acumulacións superiores aos 40 litros por metro cadrado en doce horas no suroeste da Coruña, no sur e no interior de Pontevedra.
A situación estenderase a outras zonas a partir das 18.00 horas, cando se activará tamén a alerta por acumulación de precipitacións nunha hora no suroeste e oeste da Coruña, no oeste, nordeste e zonas de montaña de Ourense, así como na área do Miño e no litoral pontevedrés.
Ademais da chuvia, o vento tamén será protagonista da xornada. Haberá aviso amarelo por refachos máximos na montaña de Ourense e na costa de Pontevedra.