A CIG convoca mobilizacións en Mercadona para reclamar garantías laborais polo modelo 'Tenda 9'
A CIG-Servizos anunciou unha campaña de mobilizacións en Galicia para reclamar a Mercadona información e garantías laborais ante a implantación do novo modelo 'Tenda 9'. O sindicato, maioritario nas provincias da Coruña, Pontevedra e Ourense, denuncia a falta de comunicación da empresa sobre un proceso que considera clave para o futuro do emprego na cadea de supermercados.
A primeira concentración celebrarase o vindeiro 30 de xuño diante do Mercadona da Gándara, en Narón, ás 11.00 horas. As protestas continuarán o 9 de xullo no establecemento da Avenida da Florida, en Vigo, e o 21 de xullo no supermercado das Lagoas, en Ourense, ambas ás 11.30 horas.
Segundo a CIG, leva desde o pasado mes de abril solicitando unha reunión coa dirección da compañía para coñecer os detalles da implantación deste novo modelo comercial, sen obter resposta. Ante esta situación, decidiu iniciar unha campaña de mobilizacións para reclamar transparencia e información sobre as consecuencias que pode ter para o persoal.
A central sindical considera que a 'Tenda 9' pode provocar unha redución dos postos de traballo, traslados de persoal a outras localidades e un incremento da contratación parcial ou descontinua. Ademais, sostén que o novo formato aposta por potenciar os produtos preparados e envasados, transformando as seccións de fresco e modificando a organización das tendas.
A CIG tamén critica que, mentres Mercadona continúa obtendo importantes beneficios económicos, o persoal afronta ritmos de traballo moi esixentes e prácticas que, ao seu xuízo, deterioran as condicións laborais. Por iso, reclama á empresa que explique con claridade como afectará a implantación da 'Tenda 9' aos traballadores e traballadoras.