A Deputación aborda vías de colaboración coa colectividade galega na República Dominicana

Durante a reunión analizouse a situación da comunidade española residente no país caribeño, integrada por unhas 3.000 persoas de orixe galega, das que arredor de 300 proceden da provincia de Ourense. Segundo se explicou, trátase dun colectivo cunha presenza relevante de perfís profesionais e empresariais, o que reforza o seu potencial como ponte para iniciativas de colaboración económica.

O Centro Galego expuxo tamén o seu labor de preservación da cultura e da identidade galega na República Dominicana, así como o seu papel na difusión da imaxe de Galicia no exterior. Ambas partes coincidiron na importancia de manter e fortalecer estes vínculos coa emigración.

No ámbito económico, Luis Menor destacou as oportunidades que ofrece a República Dominicana como destino de investimento, pola súa estabilidade e seguridade xurídica. Neste contexto, o presidente provincial trasladou a disposición da Deputación para colaborar co Centro Galego radicado en Santo Domingo e facilitar contactos que permitan ás empresas ourensás analizar posibles implantacións ou alianzas no país caribeño, abrindo así novas oportunidades de negocio.

O encontro enmárcase na estratexia da institución provincial para reforzar os lazos coa Galicia exterior, considerada un actor clave na proxección internacional da provincia.