A Deputación achega máis de 162.000 euros ao Polígono de San Cibrao das Viñas para reforzar a súa actividade económica
A Xunta de Goberno da Deputación de Ourense aprobou dúas liñas de colaboración coa Asociación de Empresarios do Polígono de San Cibrao das Viñas que suman un investimento global de 162.258,25 euros, co obxectivo de apoiar o funcionamento da entidade e impulsar a mellora das infraestruturas do parque empresarial.
Por unha banda, a institución provincial destina 40.000 euros ao financiamento dos gastos de funcionamento e mantemento da asociación durante o exercicio 2026, co fin de garantir a continuidade da súa actividade ordinaria e dos servizos de apoio ao tecido empresarial instalado no polígono.
A segunda liña de axuda ascende a 122.258,25 euros e está dirixida ao proxecto de adecuación e ampliación do edificio multiusos do Polígono de San Cibrao das Viñas. Esta actuación busca mellorar os espazos dispoñibles para actividades empresariais, reunións e servizos comúns, co obxectivo de reforzar a competitividade e a capacidade de dinamización económica da área industrial.
A Deputación enmarca estas achegas na súa estratexia de apoio ás áreas empresariais da provincia, consideradas clave para a xeración de emprego e o desenvolvemento económico sostible en Ourense.