Deputación

Segundo os datos achegados pola Federación Galega de Caza, os accidentes provocados por especies como o xabaril ou o corzo roldan os 1.700 sinistros anuais nas estradas ourensás

A Deputación de Ourense reforzará a súa colaboración coa Federación Galega de Caza na provincia co obxectivo de impulsar medidas de prevención de incendios forestais e reducir os accidentes de tráfico causados pola presenza de animais nas estradas.

Así o anunciou o presidente provincial, Luis Menor, tras manter un encontro co novo presidente da Federación Galega de Caza en Ourense, Vicente Lameiro, no que analizaron distintas vías de colaboración entre ambas entidades.
Durante a reunión, Luis Menor puxo en valor o papel da actividade cinexética na provincia, sinalando que “axuda a reducir os prexuízos que provoca o descontrol cinexético, de modo particular con especies como corzos e os xabarís”.

O presidente provincial comprometeuse a apoiar economicamente aos tecores ourensáns, a través da Federación, para impulsar actuacións relacionadas coa limpeza dos montes, unha medida que considera prioritaria para contribuír á prevención dos lumes forestais e ao control da fauna salvaxe.

Ademais, a Deputación tamén prevé intensificar os traballos de limpeza nas marxes das estradas provinciais co fin de mellorar a visibilidade e facilitar a detección temperá de animais nas proximidades da calzada. Segundo explicou Luis Menor, esta actuación permitirá “favorecer a detección temperá de animais nas inmediacións da calzada, o que axudará a reducir sinistros de tráfico”.

Pola súa banda, Vicente Lameiro agradeceu a receptividade mostrada pola institución provincial ás propostas formuladas polos técnicos da Federación, asegurando que “repercutirán positivamente nos tecores, que son os que mellor coñecen o territorio”.

Segundo os datos achegados pola Federación Galega de Caza, os accidentes provocados por especies como o xabaril ou o corzo roldan os 1.700 sinistros anuais nas estradas ourensás.

Na actualidade, 74 dos 109 tecores existentes na provincia forman parte da Federación Galega de Caza, que aspira a lograr a integración de todos eles nos próximos anos.