Agro

A Xunta de Goberno aproba dúas convocatorias inéditas por 350.000 euros para respaldar ás explotacións agrícolas e gandeiras, impulsar a recría e reforzar a xestión do territorio, ademais doutras partidas para concellos e entidades da provincia

A Xunta de Goberno da Deputación de Ourense repasou este luns un total de 30 asuntos que suman 796.589,13 euros, co sector primario como gran protagonista da sesión: a institución destinará 350.000 euros a dúas liñas de axuda de nova creación, resultado de compromisos previamente asumidos polo organismo provincial.

O presidente provincial, Luis Menor, subliñou que estas medidas responden a unha estratexia que une o respaldo aos profesionais do campo coa conservación do territorio e a loita contra o lume. Segundo explicou, axudar a agricultores e gandeiros supón tamén coidar e manter vivo o rural ourensán.

Unha liña nova contra o lume e en apoio das explotacións

Entre as novidades destaca a aprobación das bases dunha convocatoria dotada con 200.000 euros orientada á prevención dos incendios forestais e ao respaldo das explotacións agrarias e gandeiras. O presidente definiuna como unha iniciativa que nace coa vontade de vincular o apoio a quen traballa o rural coa protección do contorno.

Esta convocatoria divídese en dúas partidas. A primeira, con 25.000 euros para gasto corrente, permitirá sufragar a recollida, o traslado, o tratamento e a reciclaxe dos plásticos que xeran as explotacións agrícolas, podendo cubrirse ata o 100 % do gasto cun tope de 1.500 euros por beneficiario. A segunda, dotada con 175.000 euros, está pensada para investimentos e financiará a compra de maquinaria destinada a previr incendios e xestionar a biomasa, como trituradoras, rozadoras para tractor ou cisternas agrícolas, entre outros bens vinculados á actividade das explotacións. Aquí as axudas poderán chegar aos 8.500 euros por beneficiario, cun máximo do 70 % do importe subvencionable, e unha mesma explotación poderá acumular ata 10.000 euros combinando ambas as partidas. O prazo para presentar solicitudes remata o 25 de setembro.

150.000 euros para impulsar a recría de gando

A segunda convocatoria aprobada, dotada con 150.000 euros, busca fomentar que as femias de vacún, ovino e caprino nacidas nas propias explotacións extensivas da provincia permanezan nelas para renovar e repoñer os rabaños, en lugar de venderse de forma temperá. Con isto preténdese compensar en parte o esforzo económico que supón para os gandeiros manter estes animais.

Deses 150.000 euros, 130.000 destínanse ao vacún e 20.000 ao ovino e cabrún. As axudas poderán alcanzar ata 500 euros por cabeza de gando vacún, cun límite de 6.000 euros por explotación, e 60 euros por animal ovino ou caprino, cun tope de 1.800 euros por explotación.

Con esta convocatoria perséguese reforzar a viabilidade económica das explotacións extensivas, favorecer o relevo nos rabaños, preservar a cabana gandeira da provincia e contribuír a que a actividade agraria siga fixando poboación no medio rural. Tamén ten un efecto preventivo fronte aos incendios, xa que o pastoreo extensivo axuda a reducir a biomasa combustible. O prazo de solicitude remata igualmente o 25 de setembro.

Máis de 221.000 euros para os concellos

En materia de cooperación cos municipios, a Xunta de Goberno deu luz verde a axudas por 221.389,13 euros. Entre elas figuran 40.000 euros para o Concello de Avión, destinados ao funcionamento do Grupo de Emerxencias Supramunicipal (GES); 50.000 euros para Verín, con destino aos conservatorios municipais; e 45.000 euros para Castrelo de Miño, para a súa casa comunitaria.

O municipio da Mezquita recibirá 11.481,63 euros para honorarios dun arquitecto técnico e outros 907,50 euros para gastos da casa comunitaria, mentres que Lobeira contará con 27.000 euros repartidos en dúas actuacións: unha fosa séptica en Tedos (11.000 euros) e o asfaltado dun vial en Fondevila (16.000 euros).

No terreo cultural e festivo aprobáronse 6.000 euros para o Premio Antón Losada de Boborás, 15.000 euros para a Festa da Vendima de Monterrei, 10.000 euros para a Festa da Pataca de Vilar de Barrio e 16.000 euros para o VIII Festival Internacional de Bandas de Gaitas de Xinzo de Limia.

A sesión incluíu tamén dúas modificacións do Plan Provincial de Cooperación ás Obras e Servizos Municipais de 2026, referidas aos concellos da Mezquita e Pontedeva.

225.200 euros para entidades económicas, sociais, culturais e deportivas

A Deputación aprobou 225.200 euros en colaboración con distintas entidades da provincia. No ámbito económico e empresarial mobilízanse 92.500 euros, entre os que sobresaen 60.000 euros para o Clúster da Pizarra de Galicia, 10.500 euros para o Centro Comercial Aberto de Ourense, 10.000 euros para a asociación de autónomos ACOA, 10.000 euros para a Asociación Provincial de Taxis de Ourense e 2.000 euros para a asociación de empresarios de instalacións e reparacións.

Na área social concédense 45.000 euros, dos que 40.000 van para as Hermanitas de los Ancianos Desamparados, co fin de adquirir maquinaria de lavandaría, e 5.000 euros para a Asociación Cultural Vagalume Valdeorras, destinados ao proxecto Encontros Familia Escola.

No apartado deportivo, o Fútbol Sala Ourense Femenino recibirá 50.000 euros para sufragar os gastos de funcionamento do club durante a tempada 2025-2026.

Outros 37.700 euros repártense entre iniciativas culturais, musicais, patrimoniais e de dinamización, entre as que se inclúen as impulsadas pola Banda de Gaitas do Irixo, a Banda de Gaitas de Celanova, a Sociedade Amigos da Banda de Música de Vilanova dos Infantes, a Asociación de Amigos do Camiño da Vía da Prata, a Asociación Integra da Limia e a Fundación Estanislao Reverter.