A Deputación de Ourense convoca axudas destinadas á prevención de incendios forestais e ao apoio do sector agrogandeiro
A Deputación Provincial de Ourense pon en marcha unha nova convocatoria de axudas dirixida ás explotacións gandeiras e agrícolas da provincia, co obxectivo de impulsar actuacións que contribúan a previr os incendios forestais e a modernizar o sector primario.
A convocatoria estrutúrase en dúas liñas de actuación. A primeira está pensada para cubrir gastos correntes derivados da recollida, o transporte, o tratamento e a reciclaxe de plásticos agrícolas, cunha contía máxima de 1.500 euros por persoa beneficiaria. A segunda liña, de carácter investidor, subvenciona a compra de maquinaria específica para a prevención de incendios —como trituradoras, rozadoiras ou cisternas agrícolas— e outros bens inventariables vinculados á actividade, cun tope de 8.500 euros.
En conxunto, ningunha persoa ou entidade beneficiaria poderá recibir máis de 10.000 euros sumando ambas as liñas.
Poderán acceder a estas axudas as persoas físicas ou xurídicas titulares de explotacións gandeiras ou agrícolas inscritas nos rexistros correspondentes (REGA ou REAGA) e radicadas na provincia de Ourense. Entre os requisitos esixidos figuran estar ao corrente das obrigas tributarias e coa Seguridade Social, non incorrer nas prohibicións previstas pola normativa xeral de subvencións, exercer a actividade agraria a título principal e contar cunha antigüidade mínima de cinco anos de alta no réxime especial de autónomos agrarios.
As solicitudes poderán presentarse ata o 25 de setembro, e as axudas concederanse en réxime de concorrencia non competitiva. Para máis información, pódese contactar co Servizo de Medio Ambiente a través da web depourense.gal ou do teléfono 988 385 000.