A Deputación de Ourense destina preto de 747.000 euros a vinte concellos para recuperar vivenda de alugueiro
A Deputación de Ourense deu un novo pulo ao seu Plan Provincial de Vivenda, unha das liñas de traballo coas que a institución pretende ampliar a oferta de alugueiro e favorecer a fixación de poboación no territorio. A Xunta de Goberno resolveu a segunda convocatoria deste programa, que reparte 746.997,35 euros entre vinte concellos da provincia para a compra, rehabilitación ou acondicionamento de inmobles destinados ao alugueiro residencial.
O presidente da institución provincial, Luis Menor, salientou que esta nova edición supón un paso máis nunha política que, ao seu xuízo, permite afrontar un dos grandes retos do rural: dispoñer de vivenda para quen desexe instalarse nos municipios da provincia.
Os concellos beneficiados por esta segunda convocatoria son Bande, Cartelle, Cualedro, Monterrei, A Peroxa, Ramirás, Taboadela, Vilamarín, A Teixeira, Chandrexa de Queixa, Vilariño de Conso, Vilar de Santos, Verea, A Bola, Rairiz de Veiga, Carballeda de Avia, Riós, Muíños, Avión e Toén.
As actuacións que se financian van desde a adquisición de inmobles ata a rehabilitación de vivendas de titularidade municipal, antigas escolas ou outros edificios públicos, ademais de obras de acondicionamento e mellora da eficiencia enerxética. Nunha boa parte dos casos, as achegas rozan os 40.000 euros por proxecto.
Preto de 1,25 millóns mobilizados en dúas convocatorias
Menor lembrou que se trata xa da segunda edición deste plan. Se se suma á primeira convocatoria, dotada con 500.000 euros e que chegou a 14 municipios, a Deputación mobilizou un total de 1.246.997,35 euros para financiar 34 actuacións municipais.
O presidente provincial explicou que o programa naceu para dar resposta a unha realidade ben coñecida polos rexedores locais: hai persoas interesadas en vivir nos concellos da provincia e, ao mesmo tempo, inmobles sen uso que se poderían recuperar. Segundo as súas palabras, o obxectivo da institución é contribuír a conectar esas dúas realidades.
Esta liña de axudas terá continuidade e gañará peso o próximo ano. Menor lembrou que o Pleno da Deputación acordou o pasado mes de xullo incrementar ata 1,5 millóns de euros a dotación do Plan Provincial de Vivenda para 2027. Ese reforzo incluirá 300.000 euros destinados a asistencia técnica especializada para os concellos, orientada a labores de investigación, identificación e regularización xurídica, rexistral e catastral de vivendas e edificacións en estado de ruína ou abandono, así como á tramitación dos expedientes municipais correspondentes.
Esta asistencia técnica cobrará especial importancia naqueles casos nos que se descoñeza a identidade das persoas propietarias, estas faleceran, non poidan ser localizadas ou existan herdanzas sen formalizar. Menor sinalou que non abonda con dispoñer de recursos para rehabilitar vivendas se antes un concello non pode determinar a titularidade dun inmoble ou regularizar a súa situación, polo que en 2027 a institución dará un paso adicional para ofrecer aos concellos ferramentas técnicas que permitan mobilizar patrimonio que hoxe permanece abandonado.
Máis de 1,12 millóns de euros en novas axudas
O Plan Provincial de Vivenda foi un dos asuntos centrais dunha Xunta de Goberno na que se abordaron 23 expedientes e se aprobaron axudas por un importe conxunto de 1.126.498,71 euros.
Dentro das convocatorias en concorrencia competitiva, que suman 848.182,04 euros, o órgano de goberno resolveu tamén as axudas destinadas a investimentos das asociacións veciñais da provincia, que reparten 99.999,99 euros entre 63 entidades, fundamentalmente para a mellora e o equipamento dos seus locais.
A isto súmase a resolución dunha nova convocatoria posta en marcha este ano pola Deputación para apoiar a formación de técnicos deportivos ourensáns. Nesta primeira edición concédense 1.184,70 euros a catro técnicos, para accións formativas relacionadas co patinaxe artístico, o balonmán, o atletismo e a natación.
278.316,67 euros para concellos e entidades
A Xunta de Goberno aprobou ademais dez subvencións a concellos por un total de 252.116,67 euros. Entre elas, 90.548,65 euros para Allariz, repartidos en dúas achegas destinadas á renovación do pavimento asfáltico e á mellora do espazo público; 52.061,74 euros para Monterrei, destinados a cofinanciar a vivenda dos mestres de Medeiros; 50.990,99 euros para Montederramo, para obras de pavimentación; e 30.515,29 euros para O Castro de Caldelas, para a instalación de paneis solares e a mellora da eficiencia enerxética.
Completan este bloque unha achega de 8.000 euros para Xunqueira de Espadanedo, destinada ao Festival Xucrea, e catro subvencións de 5.000 euros cada unha para os concellos da Arnoia e Cenlle, correspondentes ás edicións de 2025 e 2026 de Espírito Ribeiro.
No apartado de entidades, aprobáronse outros 26.200 euros repartidos entre a Asociación de Viúvas María Andrea, a Asociación Xuvenil-Cultural Banda de Gaitas de Cea, a Asociación Veciñal Gutier Menéndez e a Asociación Galega de Vitivinicultura Artesanal 'Colleiteiros'.
A sesión incluíu tamén cinco modificacións do Plan Provincial de Cooperación ás Obras e Servizos Municipais de 2026, relativas a actuacións nos concellos de Baltar, Piñor, San Xoán de Río, Trasmiras e A Veiga.
Coas novas axudas aprobadas, a Deputación de Ourense alcanza un total de 9.778.186,40 euros mobilizados a través das Xuntas de Goberno desde o pasado 17 de agosto, preto de 9,8 millóns de euros en pouco máis de mes e medio.