A Deputación de Ourense recuperará en outubro a Mostra dos Viños da Ribeira Sacra
A Deputación de Ourense avanza na recuperación da Mostra dos Viños da Ribeira Sacra ourensá, unha iniciativa que se retomará este ano con “nova forza” grazas á colaboración entre administracións locais e o sector vitivinícola.
O presidente provincial, Luis Menor, destacou a “unión total” entre institucións e sector para relanzar esta proposta estratéxica para o territorio, que xa ten data confirmada: a fin de semana do 24 de outubro, unha vez finalizados os traballos da vendima.
Menor realizou estas declaracións tras unha reunión de traballo con alcaldes e representantes dos municipios que forman parte da Denominación de Orixe Ribeira Sacra (A Peroxa, Nogueira de Ramuín, Parada de Sil, A Teixeira, O Castro de Caldelas, San Xoán de Río, A Pobra de Trives e Manzaneda), ademais de representantes do sector vitivinícola. No encontro avanzouse na definición desta iniciativa, cuxo obxectivo é poñer en valor un dos principais sinais de identidade do territorio.
Esta reunión dá continuidade á celebrada o pasado 24 de marzo no Pazo Provincial, na que xa se acordara impulsar a feira como ferramenta de promoción da Ribeira Sacra ourensá.
No encontro quedou constituída unha comisión organizadora integrada por representantes institucionais —a alcaldesa do Castro de Caldelas, Sara Inés Vega, e os alcaldes da Peroxa e A Teixeira, Manuel Seoane e Xosé Vázquez— xunto cos adegueiros Carlos Rodicio, Jorge Ferreiro e César Enríquez “Cachín”. Este grupo será o encargado de deseñar a nova etapa da mostra.
Así mesmo, acordouse que a celebración terá lugar a fin de semana do 24 de outubro, coincidindo co final da vendima, como homenaxe ao traballo de viticultores e adegueiros.
A partir de agora, a comisión traballará no deseño das actividades e no formato do evento, que inicialmente se expón como itinerante, co obxectivo de percorrer distintos puntos da comarca.
O presidente da Deputación subliñou que existe unha “visión compartida e unánime” sobre a necesidade de recuperar esta mostra como ferramenta de promoción do viño e do territorio nun momento clave. Neste sentido, sinalou que a iniciativa supón “un aliciente máis” nun ano no que a Ribeira Sacra aspira a ser recoñecida como Patrimonio da Humanidade.
Finalmente, Menor puxo en valor a “unión total” entre institucións e sector como base para recuperar esta mostra como motor económico e elemento de proxección exterior da provincia, reafirmando o compromiso coa dinamización do rural.