A Escola de Artes e Oficios da Deputación de Ourense comeza o curso cunha cifra récord de 295 alumnos matriculados
A Escola de Artes e Oficios da Deputación de Ourense inaugurou esta tarde o curso académico 2026-2027 cunha cifra histórica de matrícula: 295 persoas inscritas nas súas diferentes especialidades. Ao acto de apertura asistiu o deputado de Representación Institucional, Rosendo Fernández, quen salientou que esta nova edición "confirma o crecente interese pola aprendizaxe artística e polos oficios tradicionais".
Fernández destacou ademais que, co inicio deste curso, a escola "consolida o seu papel como espazo de formación e creación artística, ao tempo que contribúe á conservación e transmisión dos coñecementos vinculados aos oficios tradicionais".
O centro ofrece ensinanzas en catro ramas: debuxo e pintura, talla en madeira, modelado en barro e oleiría. Segundo se explicou durante o acto, a actividade da escola experimentou un crecemento notable nos últimos tempos, un aumento que se vincula especialmente á decisión da institución provincial de ampliar o horario lectivo, duplicando a dispoñibilidade do profesorado e permitindo así que máis persoas poidan acceder a esta formación.
As clases desenvólvense en horario de tarde, entre as 16.00 e as 21.00 horas, distribuídas en diferentes grupos de traballo que se organizan en función do número de inscritos e da dispoñibilidade do alumnado. Entre as disciplinas impartidas, debuxo e pintura é a que concentra un maior número de matriculados, seguida da especialidade de oleiría.
A formación que se imparte nas aulas complétase coa exposición pública dos traballos elaborados polo alumnado. Nos últimos cursos, estas creacións puidéronse ver en distintas mostras organizadas na Biblioteca Pública de Ourense Nós e nas salas do Centro Cultural Marcos Valcárcel, dando a coñecer á cidadanía o resultado do traballo realizado na escola e a variedade de técnicas que alí se ensinan.