A Escola de Gaitas de Cea ten aberto o prazo de inscrición para novos alumnos de gaita e percusión
A Asociación Banda de Gaitas de Cea comunicou que segue aberto o proceso de inscrición para quen desexe incorporarse á entidade, sen que exista ningunha restrición de idade para participar.
A iniciativa contempla clases de iniciación tanto de gaita coma de percusión, dirixidas aos novos alumnos que queiran comezar nestas disciplinas. As leccións impartiranse en dous puntos distintos. Por unha banda, no colexio de Cea, os xoves de 15.45 a 16.45 horas. Por outra, na propia localidade de Cea, os sábados de 18.30 a 19.30 horas, nunha franxa aberta tanto a nenos coma a persoas adultas. En ambos os casos, a cota mensual fixouse en 20 euros.
Xunto a estas clases de iniciación, a asociación mantén tamén os ensaios das súas dúas formacións. A banda infantil ensaia os sábados, de 19.30 a 21.00 horas, mentres que a banda interxeracional se reúne un sábado ao mes.
Para poder integrarse en calquera das bandas é imprescindible facerse socio da entidade. A cota de socio sitúase en 12 euros anuais, que se reduce a 6 euros ao ano no caso dos menores.
A Banda de Gaitas de Cea destaca na súa traxectoria ter conseguido en seis ocasións o título de campións galegos e outras seis veces o de campións nacionais.
As persoas interesadas en obter máis información ou formalizar a súa inscrición poden poñerse en contacto a través do correo electrónico bandadegaitasdecea@gmail.com, do teléfono 711 272 675, ou a través dos perfís da entidade en Facebook e Instagram.