A Fundación Curros Enríquez e a AELG únense para impulsar novas iniciativas arredor da literatura galega en Celanova
A Fundación Curros Enríquez e a Asociación de Escritoras e Escritores en Lingua Galega (AELG) formalizaron un convenio de colaboración co obxectivo de reforzar a promoción da literatura galega e, de maneira especial, da creación literaria vinculada á Terra de Celanova.
O acordo foi rubricado polo presidente da AELG, Cesáreo Sánchez, e polo alcalde de Celanova e representante da Fundación Curros Enríquez, Antonio Puga, establecendo un marco de colaboración para desenvolver iniciativas de interese común entre ambas institucións.
A través deste convenio preténdese coordinar e impulsar unha programación compartida arredor da literatura galega, prestando especial atención aos autores e autoras da comarca celanovesa.
Entre as actuacións previstas figura a organización de conferencias, obradoiros, seminarios e presentacións de libros que se celebrarán na Casa dos Poetas. O acordo tamén contempla a creación e desenvolvemento de rutas culturais e literarias para divulgar o patrimonio vinculado á literatura da zona.
Outra das liñas de traballo será a difusión da obra dos escritores e escritoras da Terra de Celanova, favorecendo ao mesmo tempo o contacto e o intercambio con integrantes da AELG.
O convenio inclúe ademais o intercambio de proxectos culturais de interese compartido e a posta en marcha de actividades relacionadas coas áreas de actuación de ambas entidades.
Coa sinatura deste acordo, a Fundación Curros Enríquez e a AELG ratifican o seu compromiso coa promoción do patrimonio literario galego e co impulso da actividade cultural na comarca de Celanova.