A IX Bienal Cromática recoñece a Helena Marqués como gañadora do certame de pintura nova
A IX edición de Cromática, Bienal de Pintura Nova, xa ten gañadora. O xurado acordou por unanimidade conceder o premio principal á artista Helena Marqués Pedraza, de Málaga, pola obra "Albarrana", destacada pola súa investigación plástica e polo diálogo que establece entre a pintura e a alquimia.
O cadro premiado foi realizado empregando esmalte, spray, acrílico, tinta e óleo sobre lenzo e forma parte do proxecto "V.I.T.R.I.O.L. La materia que estalla", unha serie na que a autora explora procesos de transformación da materia a través da pintura. A composición constrúese a partir da destrución e da superposición de capas, con xestos que rasgan a superficie antes do secado, acumulacións de pigmento e manchas que ocultan parte da obra, convertendo o propio proceso creativo nun elemento central da peza.
Ademais do premio principal, o certame distinguiu con cinco accésits outras propostas artísticas. O primeiro foi para Raquel Anca, de Santiago de Compostela, por "Noites brancas"; o segundo recaeu en Xavier Saus i Ortega, de Moixent (Valencia), pola obra "Retrato, serie rosa nº 3"; o terceiro foi para Adrián Jorques, de Vallada (Valencia), con "Sin título XI"; o cuarto correspondeu á ourensá Laura Paz, por "La belleza de permanecer"; e o quinto foi para Miguel Tierra Rodríguez, de Monforte de Lemos, coa peza "Todo lo que viene, va".
Con esta nova edición, Cromática consolídase como unha plataforma de promoción da creación artística emerxente, reunindo propostas de diferentes puntos do país e ofrecendo visibilidade ao talento das novas xeracións de pintores.