A Praza Maior do Carballiño reunirá preto de 2.000 persoas na Festa das Camisetas
O Carballiño celebrará mañá unha nova edición da Festa das Camisetas, unha das actividades tradicionais vinculadas á Festa do Pulpo e unha das citas con maior participación dentro da programación. Neste ano, preto de 2.000 persoas integradas en arredor de 90 peñas formalizaron a súa inscrición no concurso de camisetas.
A actividade desenvolverase na Praza Maior a partir das 18.00 horas. Ata este punto achegaranse as diferentes agrupacións participantes, integradas por familias, grupos de amizades, asociacións culturais e lúdicas e outros colectivos sociais. Alí poderán exhibir os deseños elaborados para a ocasión e participar no photocall habilitado polo Concello para realizar as fotografías oficiais de cada grupo.
A valoración das propostas correrá a cargo dun xurado presidido polo concelleiro de Turismo e composto tamén por unha persoa representante de cada peña. O fallo darase a coñecer a partir das 20.00 horas e determinará as tres camisetas gañadoras desta edición.
A peña que obteña o primeiro posto recibirá un premio de 300 euros, mentres que a segunda clasificada obterá 200 euros e a terceira, 100 euros.
Á marxe destes galardóns, as peñas que cumpran as condicións establecidas nas bases terán dereito a percibir 60 euros. Esta compensación estará condicionada ao crédito dispoñible e, se este resulta insuficiente para atender todas as solicitudes, a asignación realizarase seguindo a orde na que se efectuaron as inscricións.
A programación da Festa das Camisetas completarase coa ambientación musical de DJ Tibu e Batucarba durante a celebración.