A provincia de Ourense terá 23 obradoiros duais de emprego cun investimento de 10 millóns
A Xunta de Galicia destinará máis de 10,5 millóns de euros á posta en marcha de 23 obradoiros duais de emprego na provincia de Ourense, unha iniciativa que permitirá formar a 460 persoas desempregadas procedentes de 57 concellos e catro mancomunidades.
O anuncio foi realizado polo delegado territorial da Xunta, Manuel Pardo, durante unha visita á Mancomunidade de Concellos do Ribeiro, onde tamén confirmou a concesión do obradoiro “Ribeiro Ecosostible”, que arrancará proximamente con 20 participantes.
Segundo explicou o representante autonómico, estes programas combinan formación e emprego mediante a realización de traballos de interese xeral e social, ao tempo que permiten aos alumnos obter un certificado de profesionalidade. Engadiu que o obxectivo é mellorar as competencias laborais dos participantes e facilitar a súa inserción no mercado de traballo.
Os obradoiros duais están dirixidos a persoas desempregadas e poden ser promovidos por concellos, mancomunidades ou entidades públicas. Ademais da formación específica, inclúen módulos transversais como prevención de riscos laborais, igualdade, informática ou busca de emprego.
A Xunta destaca tamén que estes programas están orientados a sectores con demanda de man de obra, como a construción, a atención sociosanitaria ou a xestión forestal e ambiental, incluíndo actuacións relacionadas coa prevención de incendios ou a recuperación de masas forestais.
No caso do obradoiro “Ribeiro Ecosostible”, o investimento ascende a 472.552 euros e permitirá a formación de dúas quendas de 10 alumnos en actividades forestais e albanelería. As prácticas incluirán actuacións de mellora ambiental e urbanización en varios municipios, como traballos en espazos públicos, sendeiros, prazas e infraestruturas locais.
A Xunta sinala que esta liña de programas busca reforzar a empregabilidade dos participantes e, nalgúns casos, facilitar mesmo a súa inserción laboral antes de rematar a formación.