A Romaría Etnográfica Raigame regresa a Vilanova dos Infantes dedicada ao 150 aniversario de “O Tío Marcos d’a Portela”
A Romaría Etnográfica Raigame celebrará o vindeiro 17 de maio de 2026 en Vilanova dos Infantes (Celanova) a súa XXIII edición cun programa que volverá converter esta cita nun dos principais referentes da cultura tradicional galega. Nesta ocasión, a organización decidiu dedicar a edición ao 150 aniversario de “O Tío Marcos d’a Portela”, considerado o primeiro xornal escrito integramente en galego.
A celebración está organizada pola Deputación de Ourense, a través do Centro de Cultura Popular Xaquín Lorenzo, e polo Concello de Celanova, coa colaboración da veciñanza de Vilanova dos Infantes. Durante toda a xornada desenvolverase un amplo programa de actividades centradas no patrimonio etnográfico, o folclore, os oficios tradicionais e a lingua galega.
Segundo destacou o vicepresidente segundo e deputado de Cultura, César Fernández, “estamos ante un dos actos culturais máis importantes da provincia, sendo Raigame a romaría etnográfica de referencia en Galicia”. Pola súa banda, o alcalde de Celanova, Antonio Puga, agarda unha gran afluencia de público a “este evento que pon en valor a nosa esencia e as nosas orixes”, ao tempo que agradeceu o “bo entendemento” entre as administracións implicadas e o labor do Centro de Cultura Popular Xaquín Lorenzo.
Nesta edición tamén se rende homenaxe á figura de Valentín Lamas Carvajal, creador e director de “O Tío Marcos d’a Portela”, coincidindo cos 120 anos do seu falecemento. A organización destaca o papel desta publicación na defensa da lingua galega e na denuncia das inxustizas sociais, políticas e económicas da época.
NOVIDADES NO PROGRAMA
Como principais novidades, a Romaría adianta o inicio das actividades ás 10.30 horas para dar cabida ao elevado número de agrupacións folclóricas participantes. Ademais, incorpórase unha nova visita guiada da man do antropólogo Xavier Viana, así como novos espazos temáticos e propostas culturais.
Entre as actividades máis destacadas inclúese un espazo dedicado a Manuel Blanco Romasanta, coñecido como o “lobishome galego”, no que se habilitará un “Túnel do Medo”. Tamén participará a Casa-Museo do Chocolate de Parada do Sil, recentemente recoñecida como colección museográfica pola Xunta de Galicia.
O programa complétase con demostracións de oficios tradicionais, obradoiros, xogos populares, visitas guiadas, concursos e actuacións musicais e de baile tradicional. Máis de vinte grupos folclóricos participarán nesta edición, que rematará ás 18.30 horas coa actuación do grupo Castro Floxo da Deputación de Ourense e da Banda de Vilanova.
HOMENAXES E RECOÑECEMENTOS
A Romaría renderá tamén homenaxe a Begoña Caamaño, figura destacada do Día das Letras Galegas 2026, e a Ramón Otero Pedrayo, nun ano no que se conmemora o seu legado.
Un dos momentos centrais será a entrega do Premio Honorífico “Adolfo Enríquez” ao escritor e xornalista Xosé Luis Méndez Ferrín, recoñecendo a súa traxectoria literaria e o seu compromiso coa propia Romaría Raigame e coa difusión da cultura galega.
A edición contará ademais con 62 postos no interior do burgo, 445 demostracións de artesáns en vivo e unha ampla oferta de gastronomía e artesanía, consolidando a Raigame como unha cita que combina tradición, identidade e participación popular.