A Xunta asegura que o CAPD de Ourense ten ocupada case toda a área residencial e xa atende usuarios no centro de día
A Xunta de Galicia confirmou que o Centro de Atención a Persoas con Discapacidade (CAPD) de Ourense ten practicamente cubertas todas as súas prazas residenciais e que o servizo de centro de día xa comezou a recibir aos primeiros usuarios.
A conselleira de Política Social e Igualdade, Fabiola García, deu conta da situación do centro durante unha intervención no Parlamento de Galicia, onde explicou que o recurso funciona "con total normalidade" tras un proceso de posta en marcha progresivo pensado para garantir unha atención de calidade.
Segundo indicou, a apertura realizouse de maneira escalonada, iniciándose coa área residencial, que na actualidade alcanza preto do 90 % da súa capacidade, e continuando posteriormente co centro de día, que xa presta servizo aos seus primeiros usuarios.
A responsable autonómica asegurou tamén que o CAPD conta co cadro de persoal necesario para atender ás persoas usuarias, cumprindo as ratios establecidas, e sinalou que o centro ofrece os servizos e as actividades lúdicas previstas para este tipo de recursos públicos.
Durante a súa intervención, Fabiola García destacou igualmente o traballo das entidades encargadas da xestión do centro, Cogami e Menela, das que salientou a súa experiencia no ámbito da atención á discapacidade e a súa especialización para atender os distintos perfís das persoas usuarias.
O CAPD de Ourense supuxo un investimento da Xunta de 10 millóns de euros e dispón de 110 prazas públicas, das que 80 son residenciais e 30 corresponden ao centro de día. O recurso está especializado na atención de persoas con trastorno do espectro autista, discapacidade intelectual, parálise cerebral e dano cerebral.
Coa posta en funcionamento deste centro, a Xunta sinala que dá resposta a unha demanda das familias da cidade e incrementa nun 25 % o número de prazas públicas destinadas á atención de persoas con discapacidade en Ourense.