A Xunta inicia a renovación da cuberta do CEIP de Sandiás cun investimento superior aos 212.000 euros
O Colexio de Educación Infantil e Primaria de Sandiás está inmerso nas obras de substitución da súa cuberta, unha actuación impulsada pola Consellería de Educación, Ciencia, Universidades e Formación Profesional que conta cun investimento de máis de 212.000 euros. Os traballos foron supervisados polo delegado territorial da Xunta en Ourense, Manuel Pardo, acompañado polo alcalde do municipio, Felipe Traveso.
A intervención suporá a renovación integral da cuberta inclinada do edificio, que será substituída por unha nova estrutura de tella cerámica. Como parte do proxecto, procederase primeiro á demolición da cuberta existente e á retirada da base de fibrocemento con amianto, eliminando así un material que require un tratamento específico por motivos de seguridade.
Unha vez rematada esta fase, instalarase sobre o forxado un novo sistema de illamento térmico composto por dez centímetros de polistireno, co obxectivo de mellorar a eficiencia enerxética do inmoble e aumentar o confort nas instalacións educativas. Posteriormente executarase a nova cuberta e renovarase o sistema de evacuación de augas mediante a substitución dos canlóns e das baixantes por elementos fabricados en chapa de aceiro galvanizado.
Segundo explicou a Xunta, esta actuación forma parte do Plan de nova arquitectura pedagóxica, un programa orientado á modernización dos centros educativos galegos mediante actuacións que melloran tanto a funcionalidade dos edificios como a súa eficiencia enerxética, ademais de favorecer espazos máis adaptados ás necesidades actuais da comunidade educativa.
Durante a visita ao centro, Manuel Pardo lembrou que a Administración autonómica está a executar un amplo plan de melloras na provincia de Ourense, con centos de actuacións en diferentes centros educativos. Entre elas figuran importantes ampliacións en institutos e colexios, así como a construción do futuro instituto do Pereiro de Aguiar, actuacións que buscan actualizar as infraestruturas educativas e ofrecer instalacións máis modernas, sostibles e adaptadas ás necesidades do alumnado.