Abertas as inscricións para a Cavernícola Race Barbadás 2025
A Cavernícola Race regresará a Barbadás o próximo 17 de maio de 2025. Esta carreira de obstáculos formará parte, por primeira vez, da Asociación Profesional de Organizadores de Carreras de Obstáculos de España (AOCO), polo que estará incluída na Liga Española AOCO 2025.
A proba consegue así posicionarse a nivel nacional, polo que se agarda que este ano aumente o número de participantes. Desde a organización informan de que o prazo de inscrición xa está aberto e que haberá tres categorías: elite, starter e popular.
O ano pasado, a proba logrou reunir a 391 persoas que se enfrontaron a diferentes probas de barro, auga e lume, cun total de 30 obstáculos. Ademais, desde a organización destacaron que o 50% das persoas inscritas foron mulleres. A proba, de carácter solidario, recadou fondos para a Asociación Española de Pacientes con Mieloma Múltiple.