Aberto o prazo de inscrición para o Campamento de Verán 2026 do Concello de Toén
O Concello de Toén vén de abrir o prazo de inscrición para o Campamento de Verán 2026, unha proposta de conciliación e ocio dirixida a nenos e nenas de entre 3 e 14 anos, que contará cun amplo programa de actividades durante os meses de verán.
O campamento desenvolverase no grupo escolar ao longo de tres quincenas: do 1 ao 15 de xullo, do 16 ao 31 de xullo e do 1 ao 14 de agosto. O horario será de 10:00 a 14:00 horas, e habilitarase tamén un servizo de madrugadores de 08:30 a 10:00 horas.
Entre as actividades previstas inclúense inchables, simulador de carreiras, touro mecánico e obradoiros, entre outras propostas de lecer.
Para participar, as persoas menores de 3 anos deberán ter cumprida esa idade antes do inicio da quincena escollida e contar con autonomía para o uso do baño. O Concello indica que o persoal monitor non realizará tarefas de cambio.
O prazo de inscrición permanecerá aberto até 25 de xuño e as solicitudes poderán presentarse nas oficinas municipais ou a través da sede electrónica do Concello de Toén.
No proceso de adxudicación das prazas terán prioridade as persoas empadroadas no municipio, así como aquelas cuxos familiares directos residan no concello. En último lugar, atenderase ao resto de solicitudes, sempre por orde de entrada.
O prezo por quincena será de 30 euros para persoas empadroadas e de 100 euros para non empadroadas, sendo o servizo de madrugadores gratuíto.
Desde o Concello de Toén anímase ás familias a participar nesta nova edición do campamento de verán.