AFAOR instala unha mesa informativa no Carballiño polo Mes do Alzhéimer
A Asociación de Familiares de Enfermos de Alzhéimer de Ourense (AFAOR) instalará o vindeiro 16 de setembro unha mesa informativa en O Carballiño, dentro dos actos organizados co gallo do Mes do Alzhéimer. A mesa estará situada na rúa Rosalía de Castro, á altura da Praza Maior, en horario de 10.00 a 13.30 horas.
Con esta iniciativa, a entidade busca dar a coñecer entre a poboación carballiñesa o traballo que desenvolve tanto coas persoas afectadas por esta enfermidade coma coas súas familias. Todas aquelas persoas interesadas en recibir orientación e información sobre o alzhéimer, así como sobre as actividades que AFAOR leva a cabo na localidade, poderán achegarse á mesa informativa para falar directamente co persoal da asociación.
Obradoiros de estimulación cognitiva
Desde hai varios anos, AFAOR desenvolve en O Carballiño, en colaboración co Concello do municipio, un obradoiro de estimulación cognitiva dirixido a persoas con deterioro cognitivo leve. Esta actividade, que conta cunha boa acollida, lévase a cabo dúas veces por semana nas instalacións de 'Bo Día Familia'.