Alberte Montes pecha en Toén a xira de “Galego pode selo calquera”
O actor e humorista Alberte Montes chega este sábado, 8 de agosto, a Toén para poñer o punto final á xira deste verán de “Galego pode selo calquera”, un espectáculo de humor que percorreu catro escenarios galegos dentro do programa de dinamización lingüística FalaRedes, impulsado pola Secretaría Xeral da Lingua.
A actuación terá lugar ás 20.30 horas no Campo da Festa de Alongos, onde Montes presentará unha versión renovada do seu monólogo, producido por Hermanager Producións. A proposta pasou durante este verán por O Carballiño, Boiro e Ribadeo antes de chegar a Toén.
En “Galego pode selo calquera”, o intérprete emprega o humor para reflexionar sobre a identidade galega, os tópicos asociados tradicionalmente á sociedade galega e a evolución da percepción que os propios galegos teñen de si mesmos. A lingua ocupa tamén un lugar central nun espectáculo que reivindica falar galego con orgullo e abordar desde a retranca as particularidades culturais de Galicia.
A proposta parte da idea de que ser galego vai moito máis alá dos estereotipos habituais e constrúe, a través do humor e da autoironía, un percorrido por diferentes trazos da identidade galega. O espectáculo pretende así combinar diversión e reflexión arredor da lingua e da forma de entenderse como galego.
Montes conta cunha ampla traxectoria como actor, cómico e guionista en televisión, cine, teatro, radio e publicidade. Na Televisión de Galicia participou en series como Do dereito e do revés e Augasquentes, ademais de formar parte de producións como Rapa, Vida perfecta ou Mano de hierro. Tamén integrou os elencos de El Pueblo e Fariña.
No ámbito do humor, participou en programas como Land Rober, Tourilandia, Buenas noches y Buenafuente ou En el aire, ademais de pasar por Comedy Central, onde gravou dous especiais de comedia. A súa carreira teatral suma xa dezaoito anos e preto de mil actuacións en directo.
A actuación de Toén forma parte do programa FalaRedes, unha iniciativa da Secretaría Xeral da Lingua destinada a achegar actividades de dinamización do galego a diferentes localidades e públicos de Galicia.