Allariz acollerá un obradoiro de primeiros auxilios dirixido a persoas coidadoras no Fogar dos Maiores
Allariz acollerá o vindeiro xoves 28 de maio un novo Obradoiro de Saúde Comunitaria centrado nos primeiros auxilios, unha iniciativa promovida polo SERGAS a través da Área Sanitaria de Ourense, Verín e O Barco de Valdeorras e o Centro de Saúde de Allariz, coa colaboración do Concello.
A sesión está especialmente dirixida á escola de persoas coidadoras e ten como obxectivo ofrecer ferramentas prácticas para saber como actuar ante unha urxencia, reforzando a seguridade e a capacitación no día a día das persoas participantes.
O obradoiro desenvolverase ás 11.15 horas no Fogar do Maior e estará impartido polas enfermeiras especialistas en enfermaría comunitaria Raquel Fernández e Andrea Fernández.
Desde a organización destacan a importancia deste tipo de formacións para mellorar a resposta ante situacións de emerxencia e achegar coñecementos básicos que poden resultar fundamentais para a saúde e o coidado da comunidade.