Allariz impulsa unha nova edición das Xornadas "Con-vivencia(s)" sobre crianza e convivencia familiar
O Concello de Allariz presentou a cuarta edición das Xornadas para Familias “Con-vivencia(s)”, unha iniciativa que se desenvolverá entre o 9 e o 22 de maio e que busca crear un espazo de apoio e aprendizaxe arredor da crianza. A programación foi presentada este martes pola concelleira de Benestar Social, Tania Álvarez, e pola educadora familiar municipal, Uxía Fernández.
Baixo o lema "Acompañando na crianza", a proposta pretende ofrecer recursos prácticos ás familias e persoas coidadoras, ao tempo que promove unha visión compartida da educación infantil. Desde a organización destacan a necesidade de fortalecer redes de apoio e avanzar cara a unha sociedade máis igualitaria desde as primeiras etapas da vida.
As actividades abordarán cuestións como a corresponsabilidade nos coidados, a seguridade dixital ou a importancia do xogo libre de estereotipos. A programación inclúe obradoiros e propostas lúdicas dirixidas a diferentes idades, combinando formación e lecer.
O calendario arrancará o 9 de maio cunha actividade de “Contos, música e danza” para crianzas pequenas. Ao día seguinte celebrarase a "Orientaventura da Corresponsabilidade", unha xincana familiar polos espazos máis representativos da vila que busca reflexionar sobre o reparto das tarefas no fogar.
O uso das novas tecnoloxías tamén terá o seu espazo cun taller titulado "Redes con rede", previsto para o día 11, centrado na seguridade dixital e aberto tanto a familias como a profesionais. Para facilitar a participación, habilitarase un servizo gratuíto de canguraxe previa solicitude.
Un dos momentos destacados será o 15 de maio, coincidindo co Día Internacional das Familias, cun encontro no Xardín do Fogar dos Maiores que incluirá un pícnic comunitario, xogos tradicionais e unha actuación musical.
As xornadas concluirán o 22 de maio cunha proposta específica para bebés de entre 6 e 24 meses, centrada no xogo sensorial. As persoas interesadas poden formalizar a súa inscrición no Fogar dos Maiores ou a través dos teléfonos habilitados polo Concello.