Allariz ofrecerá en setembro un curso gratuíto para iniciarse na lingua e na cultura galegas
O Concello de Allariz abrirá en setembro unha nova edición do Curso de Introdución á Lingua e á Cultura Galegas, unha iniciativa promovida pola Secretaría Xeral da Lingua en colaboración co municipio dentro da Rede de Dinamización Lingüística. A proposta está orientada a persoas que desexen achegarse por primeira vez ao galego e coñecer os principais aspectos da cultura propia de Galicia.
A actividade será totalmente gratuíta e estará destinada a maiores de 16 anos, ofrecendo unha primeira toma de contacto co idioma a través dunha formación presencial adaptada a quen inicia a súa aprendizaxe.
O curso desenvolverase entre o 1 e o 24 de setembro, con sesións os martes e xoves, en horario de 18.00 a 20.30 horas, ata completar un total de 20 horas lectivas.
Ao remate da formación, o alumnado que cumpra cos requisitos establecidos recibirá un diploma de aproveitamento expedido pola Secretaría Xeral da Lingua, que acreditará a participación e o seguimento do curso.
As persoas interesadas en participar xa poden solicitar unha praza enviando un correo electrónico ao enderezo educacion@allariz.gal, onde tamén poderán obter máis información sobre esta iniciativa formativa.