Allariz organiza un obradoiro participativo para recuperar a memoria dos espazos de traballo do municipio
Allariz acollerá o vindeiro xoves 9 de xullo un obradoiro participativo centrado na recuperación da memoria colectiva arredor da transformación dos espazos de traballo do municipio. A actividade desenvolverase entre as 10.00 e as 12.00 horas e buscará recordar e poñer en valor os oficios e actividades económicas que marcaron a historia da localidade.
A proposta desenvolverase a través dun percorrido a pé que permitirá ás persoas participantes lembrar antigos comercios, fábricas de chocolate, obradoiros artesáns, tendas de tecidos, empresas de gaseosas ou o traballo das telefonistas, entre outros espazos e profesións que formaron parte da vida diaria de Allariz ao longo dos anos.
A iniciativa pretende converterse nun espazo para compartir vivencias, experiencias e recordos, favorecendo unha reflexión colectiva sobre os cambios experimentados nos traballos, nas rúas e nos lugares que forman parte da identidade do municipio.
Esta actividade forma parte do Microproxecto de Arquitectura e Educación Social e contará coa coordinación da arquitecta municipal e da educadora social. O principal obxectivo desta proposta é recuperar a memoria das persoas maiores e destacar o valor do patrimonio humano, cultural e laboral de Allariz.
As inscricións poden realizarse no Fogar dos Maiores ata o mércores 8 de xullo.