Allariz pon en marcha un curso gratuíto de danza e autocoidado para mulleres
O Concello de Allariz, a través da Área de Benestar Social e Igualdade, pon en marcha un curso gratuíto de danza e autocoidado para mulleres, que se desenvolverá durante os meses de febreiro, marzo, abril e maio. Esta iniciativa, financiada polo Pacto de Estado contra a Violencia de Xénero, contará coa dirección da recoñecida bailarina e coreógrafa Nuria Sotelo.
As sesións celebraranse todos os luns, de 17:30 a 18:30, no Fogar dos Maiores, e están deseñadas para mulleres de todas as idades, sen necesidade de experiencia previa. A actividade busca fomentar o benestar físico e emocional, creando un espazo seguro onde conectar co corpo, mellorar a saúde e fortalecer a autoestima.
A través dunha combinación de danza contemporánea, pilates, ioga e técnicas de respiración consciente, este curso ten como obxectivo ofrecer ferramentas prácticas que as participantes poidan aplicar no seu día a día, contribuíndo á mellora do seu benestar integral.
O curso ten por obxectivo mellorar a saúde física e emocional, reducir o estrés e mellorar o estado de ánimo, fomentar o empoderamento persoal e fortalecer a autoestima, crear lazos sociais nun entorno colaborativo e fomentar a coordinación motora e a expresión emocional.
"Con esta proposta, o Concello de Allariz reafirma o seu compromiso coa igualdade e o benestar das mulleres, promovendo actividades que potencien a súa saúde e empoderamento", sinalan dende a organización.
Para participar, é necesaria a inscrición previa, que pode realizarse chamando ao teléfono 988 554 059.