Amencer organiza en Ourense varias actividades xuvenís xunto á campaña do Domund
A Asociación Xuvenil Amencer, con sede en Ourense, programou unha serie de actividades para esta fin de semana, do 17 ao 18 de outubro, coincidindo coa celebración do Domund, o Domingo Mundial das Misións.
Entre as iniciativas destaca a instalación dunha mesa informativa na rúa Progreso, á altura do edificio de Mapfre e fronte ao colexio Salesianos, co obxectivo de recadar fondos destinados a esta campaña. Na actividade participarán rapaces e rapazas dos grupos Andaina e ADS, xunto con alumnado do colexio salesiano e membros de Amencer, acompañados por animadores e profesorado do centro. A mesa permanecerá instalada o sábado de 11.15 a 13.00 horas, e o domingo de 11.00 a 14.00 horas.
Durante o sábado desenvolveranse tamén outras actividades semanais propias da asociación. O grupo Andaina, formado por nenos e nenas de entre 9 e 11 anos, colaborará igualmente na mesa do Domund, animando aos viandantes a colaborar coa labor dos misioneiros e misioneiras repartidos polos cinco continentes.
Pola súa banda, o grupo ADS, integrado por mozos e mozas de entre 12 e 14 anos, afrontará o reto de completar un escape room nas instalacións de Salesianos, ademais de participar tamén na recadación solidaria fronte ao centro escolar.
Os máis pequenos do grupo Saltimbanquis, de entre 6 e 9 anos, continuarán coa súa proposta lúdica titulada 'Perdidos polo mundo: Oceanía', unha actividade de carácter narrativo na que, tras un imprevisto na súa viaxe, os participantes chegan ata Oceanía, onde contarán coa axuda dunha personaxe chamada Teranga para continuar despois rumbo a Italia, facendo antes unha parada no continente americano.
O venres 16 de outubro, pola súa banda, está reservado ao denominado 'Venres de animadores', un encontro mensual dirixido aos maiores de 18 anos que forman parte do equipo de animación de Amencer. Esta cita, que se celebra dúas veces ao mes, está pensada para a convivencia, a formación, a organización interna e momentos de lecer compartido. Nesta ocasión presentarase a programación correspondente ao primeiro trimestre do curso 2026/2027.
Ademais, a asociación mantén activo durante as fins de semana o proxecto 'Amencer á carta', que consiste en adaptar os horarios do local ás necesidades dos distintos grupos informais de xuventude. A través desta iniciativa ponse a disposición espazos como a sala de xogos, a tebeoteca ou a sala de estudo, sempre con cita previa para reservar o uso do espazo requirido.