Amoeiro acolle esta tarde unha Exhibición de Baile no Pavillón Municipal
Amoeiro celebra este xoves 11 de xuño de 2026 unha nova edición da Exhibición de Baile, unha actividade que terá lugar no Pavillón Municipal de Deportes a partir das 20:00 horas e que reunirá alumnado procedente de diferentes parroquias do municipio.
Na exhibición participarán os grupos de baile de Parada de Amoeiro, Loureiro, Fontefría, Bóveda, A Bergueira e Amoeiro, nunha proposta que busca poñer en valor o traballo realizado ao longo do ano nas distintas actividades formativas.
O evento contará ademais coa colaboración da Asociación de Veciños do Couto, do Centro Sociocomunitario Pontepelamios e da Asociación Veciñal Quince de Agosto (Reza), que contribúen á organización e ao desenvolvemento da actividade.
As clases están dirixidas polas profesoras Andrea Araujo Passanisi e Eva Moreno, responsables da coordinación dos diferentes grupos participantes.
Ao remate da exhibición, está prevista unha sesión de ioga con exercicios de relaxación e estiramentos aberta ao público asistente. As persoas interesadas en participar nesta actividade poderán facelo sempre que leven a súa propia esterilla.