Amoeiro celebrou o Día das Letras Galegas con música e baile no Campo do Souto
Amoeiro celebrou o Día das Letras Galegas con música e baile no Campo do Souto
O evento reuniu alumnado e profesorado das actividades municipais, a Banda de Gaitas e a Escola de Música e Baile Tradicionais Devalar
O Concello de Amoeiro sumouse á conmemoración do Día das Letras Galegas 2026 cun acto celebrado onte pola tarde no Campo do Souto, no que se combinou actividade física, música tradicional e homenaxe á cultura galega.
Na iniciativa participaron o alumnado e profesorado das clases municipais de mantemento deportivo, acompañados pola Banda de Gaitas de Amoeiro e pola Escola de Música e Baile Tradicionais “Devalar”, nun encontro no que se puxo en valor a convivencia e a identidade cultural.
Tras as actuacións, procedeuse á lectura dunha declaración institucional na que se destacou a importancia da lingua, da cultura e das tradicións como elementos de unión social. No texto tamén se lembrou a figura da escritora e xornalista Begoña Caamaño, á que se lle dedica este ano o Día das Letras Galegas, pola súa defensa da lingua e da identidade galega.
Durante o acto explicouse tamén o papel das muiñeiras como eixo da celebración, nunha proposta centrada na participación comunitaria e non na exhibición técnica, destacando o carácter aberto e popular da actividade.
A declaración rematou cun chamamento a fortalecer a comunidade a través da cultura e da participación colectiva, reivindicando a música, o baile e o uso do galego como sinais de identidade compartida.