As obras na N-525 entre Ourense e Rante estenderanse até o 13 de novembro
A estrada N-525 terá afeccións ao tráfico a partir do vindeiro martes, 13 de outubro, debido ás obras de reparación que se executarán no tramo entre Ourense e Rante, no municipio de San Cibrao das Viñas. Os traballos prolongaranse ata o 13 de novembro e poderían provocar retencións nos accesos ás zonas industriais.
A Policía Local de Ourense informou destas actuacións, que serán realizadas polo Ministerio de Transportes e Mobilidade Sostible, e recomendou evitar este tramo da estrada durante o período das obras. Como alternativas para os desprazamentos, o corpo policial propón utilizar a autovía A-52 ou a estrada de Trives.
As intervencións enmárcanse nun proxecto estatal de obras de emerxencia destinado a reparar e estabilizar noiros de desmonte. Estes traballos son necesarios polos danos ocasionados polas sucesivas borrascas que afectaron á provincia a comezos deste ano.