As promesas do atletismo daranse cita esta fin de semana en Expourense no Campionato de España Sub16
Un total de 37 atletas galegos representarán a Galicia no Campionato de España Sub16, que se celebrará nas pistas ourensás de Expourense o vindeiro fin de semana. Esta nova xeración do atletismo galego chega a esta cita con moitas opcións de lograr bos rexistros nunha competición na que a grada, unha vez máis, se agarda que estea chea.
Entre os participantes galegos figuran, nos 60 m., Sofía Paz do At. Barbanza e Mateo Refojo do Rías Baixas, quen aspiran a ocupar un posto no podio na proba raína da velocidade curta.
Entre os aspirantes a podio nos 600 m. atópase Hugo Zuluaga do At. Sada, quen parte como un dos serios candidatos a medallas, ao igual que Alejandro Freire do Coruña Comarca.
Na proba dos 1000 m., destaca a presenza de Xoel Franco do Beade, medallista de bronce na edición anterior, quen lidera claramente o ranking de España cun tempo de 2:33.02. Na mesma proba, Ismael Rodríguez de A Gándara será outro dos galegos con aspiracións de estar entre os mellores.
En combinadas, Joel Santana do Celta lidera o ranking da modalidade, sendo o único atleta en superar a barreira dos catro mil puntos. Nesta mesma disciplina, Olivia Gutiérrez, tamén do Celta, intentará mellorar o seu sexto posto do ano pasado e loitar por un posto no podio, para o cal necesitará superar os 3.500 puntos.
Nos 3.000 m., a atención estará posta en Enrique García, atleta lucense que parte entre os favoritos da proba, mentres que nos 600 m., Lucía Cando da Polideportiva Lucense tamén buscará unha actuación destacada.
No concurso de triplo, Bruno Castro do Coruña Comarca, que tamén participará nos 60 m. vallas, é outra das opcións serias de podio, xa que chega coa segunda mellor marca dos participantes, 13.04 m.
Nos outros concursos, seguirase de cerca a actuación de Sara Faraldo do At. Sada en altura, así como da subcampioa de España do ano pasado, Sara Caamaño do At. Barbanza, en peso.
Temporada de pista cuberta
Con este campionato péchase a tempada de pista cuberta en Galicia, unha tempada que deixou importantes cifras de participación e asistencia, subliñando a relevancia que para o atletismo galego teñen tanto a pista cuberta de Expourense como os módulos de Vigo e Lugo, sen esquecer a pista cuberta da Coruña, que segue sendo un escenario activo de probas e campionatos a pesar da súa antigüedade.
Durante a tempada celebráronse máis de 45 probas en Lugo, Vigo e A Coruña, sendo a pista de Expourense a que acolleu a maioría delas desde o comezo da tempada en novembro. Ao longo dos fines de semana, contouse con actividade federada baixo teito, ademais das competicións de campo a través, ruta, aire libre e trail running.
En termos de cifras, durante estes cinco meses celebráronse un total de dezaseis campionatos de Galicia na modalidade indoor, vinte controis de atletismo para todas as categorías, dúas copas de clubs, un Meeting Internacional, dous campionatos de España (incluíndo o actual), un trofeo de categorías menores, dúas xornadas de promoción e dous trofeos de patrocinio privado (La Región). Estímase que o número total de atletas participantes superou os 8.000 inscritos, e rexistráronse 34 novos récords de Galicia, destacando especialmente o récord do mundo máster logrado por Iván Morales na proba dos 3.000 marcha o pasado mes de febreiro.