Política

As propostas, defendidas pola voceira socialista Natalia González no Consello Municipal de Servizos Sociais, tiñan como obxectivo facer as bases “máis útiles, máis flexibles e máis adaptadas á realidade das entidades sociais”

O grupo municipal socialista no Concello de Ourense valora de forma positiva a inclusión total ou parcial de varias das emendas presentadas ao borrador das bases reguladoras das subvencións en materia de servizos sociais para os exercicios 2026 e seguintes.

As propostas, defendidas pola voceira socialista Natalia González no Consello Municipal de Servizos Sociais, tiñan como obxectivo facer as bases “máis útiles, máis flexibles e máis adaptadas á realidade das entidades sociais”, introducindo cambios orientados á simplificación administrativa, á mellora da xestión e a dar maior estabilidade aos programas desenvolvidos por asociacións e colectivos da cidade.

Entre as principais novidades incorporadas figura a posibilidade de reformular os proxectos no caso de que a subvención concedida sexa inferior á solicitada, co fin de evitar renuncias e facilitar a adaptación das actividades ás contías finalmente aprobadas.

Tamén se recollen cambios en materia de flexibilidade orzamentaria, permitindo ampliar ata un 40% determinadas desviacións de gasto en situacións excepcionais debidamente xustificadas, co obxectivo de facilitar a execución dos programas ante imprevistos.

Outro dos avances destacados é a axilización dos pagamentos ás entidades sociais, coa fixación de prazos concretos para o aboamento das subvencións e dos anticipos, así como melloras no sistema de pagamentos anticipados e na flexibilización das garantías esixidas ás entidades con boa traxectoria de xustificación.

As bases incorporan ademais a posibilidade de convocatorias plurianuais e de pagamentos fraccionados, unha medida que, segundo Natalia González, resulta clave para “dar estabilidade, continuidade e capacidade de planificación ás entidades sociais que traballan de maneira permanente coa veciñanza”.
Do mesmo xeito, recóllense como subvencionables gastos relacionados coa coordinación, xestión, seguros e manutención das actividades, atendendo ás necesidades trasladadas polo terceiro sector.

As socialistas valoran tamén a apertura á implantación de futuros sistemas de xustificación simplificada, co obxectivo de reducir a carga burocrática e facilitar o acceso ás axudas ás entidades de menor tamaño.

Finalmente, Natalia González sinala que as propostas realizadas “non buscaban facer ruído político, senón mellorar o funcionamento real das subvencións e responder ás dificultades que levan anos trasladando as entidades sociais de Ourense”.