As terceiras Xornadas Galaico Portuguesas chegan a Allariz
Allariz acollerá esta fin de semana as III Xornadas Galaico-Portuguesas, unha proposta centrada na cultura e na lingua galega e portuguesa que combina actividades académicas, literarias, gastronómicas e musicais. O encontro está organizado pola asociación Asociación Cultural O Tangaraño de Sobradelo e Galiportus, coa colaboración do Concello de Allariz e Aira das Letras.
A programación arrancará o sábado 18 de abril cunha xornada dedicada aos encontros culturais e ao intercambio de ideas entre Galicia e Portugal. Tras a recepción e apertura oficial, a mañá incluirá unha charla sobre as paralelidades históricas entre Allariz e Ponte da Lima, seguida da presentación de Aritmar, un proxecto que celebra unha década unindo poesía e música de ambos territorios.
A gastronomía tamén terá un papel destacado ao longo do día, con xantares e ceas de inspiración galaico-portuguesa que requiren reserva previa. Entre as propostas culinarias inclúense pratos como caldo, arroz con bacallau ou doces tradicionais, convertendo a experiencia nun encontro tamén arredor da mesa.
Xa pola tarde, a programación continuará con intervencións centradas na cultura e no compromiso social, como a participación de OZÔCO GZ, que abordará a identidade e o seu vínculo coa cultura galega. A xornada incluirá ademais un club de lectura e unha mesa de debate sobre cuestións de actualidade, antes de dar paso á música na noite.
O domingo 19 estará dedicado a un formato máis experiencial, combinando patrimonio e natureza cun roteiro cultural que seguirá as pegadas de Santa María en Galicia e Portugal. A actividade completarase cun recital poético e un concerto acompañado dun espazo de encontro arredor do viño e produtos tradicionais, antes da clausura das xornadas.
Con esta programación, as III Xornadas Galaico-Portuguesas buscan reforzar os lazos culturais entre ambos territorios a través dunha proposta diversa que mestura reflexión, creación e participación cidadá.