Avión súmase ás melloras de seguridade viaria na PO-235 ao seu paso pola Lama
A estrada PO-235 será obxecto dunhas obras de acondicionamento integral ao seu paso polo Concello da Lama, unha actuación que ten como principal obxectivo mellorar a seguridade viaria e as comunicacións na zona. Os traballos non só afectan ao propio Concello lamego, senón que repercuten tamén nos municipios veciños, especialmente naquelas parroquias e núcleos de poboación máis próximos á Lama que utilizan habitualmente esta vía para os seus desprazamentos cotiáns.
En concreto, desde o Concello de Avión salientouse que esta mellora beneficiará de xeito directo a zonas como Hedreira, Acebedo e Rubillón, cuxos veciños recorren con frecuencia a esta estrada. Por iso, desde o goberno local avionés valorouse positivamente esta intervención, ao consideraa clave para garantir unhas comunicacións máis seguras entre os distintos núcleos da comarca.
Por outra banda, aproveitando o contexto desta actuación na PO-235, representantes municipais de Avión e Beariz mantiveron unha conversa con responsables autonómicos de Infraestruturas para trasladar o seu interese polo estado das obras da OU-212, que une as localidades de Liñares e Beariz. Segundo se trasladou nese encontro, os traballos nesta vía reanudaranse "moi pronto", unha vez queden resoltos os trámites administrativos pendentes necesarios para poder continuar coa actuación.
Desde o Concello de Avión insistiuse en que se continuará facendo seguimento deste tipo de actuacións viarias, ao entender que contar con estradas seguras e en bo estado resulta fundamental para a mobilidade, as comunicacións e a calidade de vida dos veciños da zona.