Baños de Molgas acollerá o 6 de outubro unha xornada de demostración de maquinaria forestal e de xardinería
O contorno do Santuario dos Milagros, en Baños de Molgas, converterase o próximo 6 de outubro nun punto de encontro para o sector forestal e de xardinería da zona. O Concello organizou unha xornada de demostración na que se poderá ver en funcionamento maquinaria forestal, de xardinería e de uso urbano, ademais de distintos equipamentos de protección.
A actividade, que comezará ás 09.30 horas, ten como obxectivo achegar aos asistentes os medios técnicos que se empregan habitualmente nas labores do monte e no coidado das zonas verdes. Segundo explicou o Concello, trátase dunha oportunidade para "ver, probar e coñecer de preto" este tipo de maquinaria.
O programa incluirá exhibicións prácticas dos equipos en funcionamento, así como a presentación de novidades e posibles solucións orientadas ao traballo diario neste sector. A organización sinalou que, ademais das demostracións, haberá un pequeno xantar para os participantes.
Desde o Concello subliñaron que se trata dunha cita aberta, dirixida tanto a profesionais e empresas do sector como aos servizos municipais e a calquera persoa interesada en coñecer máis sobre esta maquinaria, sen necesidade de inscrición previa segundo a información facilitada.