Barbadás estrea un mural colectivo dedicado a Clara Campoamor no Parque dos Patos
O Parque dos Patos de Barbadás loce dende hoxe un novo mural colectivo dedicado a Clara Campoamor, avogada, política e unha das figuras máis destacadas do sufraxismo español polo seu papel na conquista do dereito ao voto das mulleres. A pintura realizouse esta mañá dentro das actividades do Programa Luz Pozo Garza, unha iniciativa municipal centrada no empoderamento feminino.
Na elaboración do mural participaron veciñas de Barbadás xunto con mulleres do Centro Ocupacional As Burgas, que se sumaron a esta xornada de traballo colectivo e creativo.
O alcalde de Barbadás, Xosé Carlos Valcárcel, explicou que este programa está dirixido a mulleres en situación de especial vulnerabilidade, tanto do ámbito rural como do núcleo urbano do concello, e que se desenvolve a través de obradoiros e encontros centrados en aspectos psicolóxicos, laborais e creativos. O rexedor acudiu á actividade acompañado do tenente de alcalde e concelleiro de Igualdade, Daniel Rey.
A dirección artística do mural correu a cargo de Tareixa Taboada, quen valorou a oportunidade de participar nun proxecto que, segundo explicou, reivindica a presenza feminina tanto no terreo literario —representado pola figura de Luz Pozo Garza— como no político, encarnado en Clara Campoamor. A artista subliñou ademais a importancia de seguir traballando pola igualdade e de dar voz a distintos colectivos de mulleres, entre eles as usuarias do centro As Burgas, que tomaron parte activa na pintura.
O resultado final do mural incorpora a imaxe de Clara Campoamor xunto a un fragmento dun dos seus discursos máis lembrados en defensa do sufraxio feminino, no que afirmaba que a liberdade se aprende exercéndoa.
O Programa Luz Pozo Garza continuará esta mesma tarde, ás 19.00 horas, cunha charla sobre estratexia dixital e uso da intelixencia artificial aplicada á procura de emprego, que terá lugar no local da Asociación Veciñal das Lamas.