Barbadás incorpora 20 novos fogares ao programa municipal de compostaxe doméstica
O Concello de Barbadás continúa reforzando as súas políticas de sustentabilidade coa incorporación de 20 novos fogares ao programa de compostaxe doméstica, unha iniciativa que busca reducir a cantidade de residuos orgánicos que rematan nos colectores e fomentar hábitos máis respectuosos co medio ambiente.
As novas persoas participantes asistiron a unha sesión formativa na que recibiron as nocións básicas para iniciar o proceso de compostaxe nas súas vivendas. Ademais, o Concello fixo entrega, de maneira totalmente gratuíta, dos correspondentes composteiros, co fin de facilitar a posta en marcha desta práctica ambiental.
Desde o goberno local destacan que cada novo fogar adherido ao programa supón un paso máis cara a unha xestión máis eficiente dos residuos, contribuíndo a diminuír o impacto ambiental e a impulsar unha economía máis sostible baseada no aproveitamento da materia orgánica.
A campaña permanece aberta para todas aquelas persoas interesadas en sumarse á iniciativa. O Concello anima á veciñanza a participar neste programa, que combina formación e recursos para favorecer a compostaxe no ámbito doméstico e avanzar cara a un municipio máis comprometido coa protección do medio ambiente.
As persoas interesadas poden solicitar máis información e formalizar a súa inscrición a través da páxina web do programa ou dos canais habilitados para este servizo.