Barbadás pon en marcha un novo obradoiro de emprego dual en aproveitamentos forestais e atención sociosanitaria
O Concello de Barbadás, en colaboración cos concellos de Toén e Taboadela, puxo en marcha un novo Obradoiro Dual de Emprego que combinará formación teórica e práctica en dúas especialidades diferentes: aproveitamentos forestais e atención sociosanitaria a persoas dependentes en institucións sociais. As dúas capacitacións permitirán ás persoas participantes obter un certificado profesional de nivel 2 na materia correspondente.
Para poder acceder ao programa, as persoas interesadas deberán cumprir unha serie de condicións. En primeiro lugar, ter 18 anos cumpridos. Ademais, será necesario atoparse en situación de desemprego e estar inscrito/a como demandante de emprego no Servizo Público de Emprego de Galicia, coa demanda en situación de alta, así como figurar inscrito/a no Obradoiro de Emprego de Barbadás. Cómpre salientar que non será posible o acceso a través da situación de mellora de emprego.
Outro dos requisitos indispensables é a posibilidade de formalizar un contrato de formación en alternancia, modalidade sobre a que se sustenta este tipo de programas duais, que combinan a aprendizaxe coa actividade laboral remunerada.
Así mesmo, as persoas aspirantes deberán cumprir os requisitos de acceso establecidos para os certificados profesionais de nivel 2. Para iso, existen varias vías admitidas: estar en posesión do título de Graduado en Educación Secundaria Obrigatoria (ESO) ou equivalente; dispor dun título de Técnico Básico de Formación Profesional; contar cun certificado profesional de nivel 2; ou ben posuír un certificado profesional de nivel 1 da mesma familia profesional.
Tamén se poderá acceder cumprindo os requisitos académicos esixidos para un ciclo formativo de grao medio, ou tendo superada a correspondente proba de acceso. Outra alternativa é ter superada a proba de acceso á universidade para maiores de 25 ou de 45 anos. Por último, tamén será válido acreditar as competencias clave necesarias de nivel 2.