Catorce entidades de Economía Social da provincia de Ourense beneficiáronse dos bonos Consolida no ano 2024
O delegado territorial da Xunta en Ourense, Manuel Pardo, achegouse esta mañá a Aspamadis, unha das empresas ourensás beneficiarias o pasado ano das axudas dos bonos Consolida para entidades de economía social.
O delegado territorial explicou na súa visita, que na provincia de Ourense resultaron beneficiadas 14 entidades, ás que a Consellería de Emprego, Comercio e Emigración fixo unha achega de preto de 187.000 euros e lembrou que está aberto o prazo dunha nova convocatoria ata o 21 de abril, cun orzamento de 2,73 millóns de euros, para seguir impulsando en Galicia a creación e a consolidación de entidades de economía social
Manuel Pardo explicou que esta liña de axudas, está dirixida especificamente a sociedades cooperativas, sociedades laborais, empresas de inserción e centros especiais de emprego. O seu obxectivo é apoiar a consolidación das entidades da economía social, así como reforzar a súa presenza no tecido económico de Galicia, con especial incidencia na transformación dixital e na mellora da eficiencia enerxética.
O representante do Goberno galego detallou que poden ser beneficiarias destes apoios sociedades cooperativas e laborais, empresas de inserción e centros especiais de emprego que estean rexistrados e acrediten unha antigüidade mínima de 42 meses.
Para a convocatoria deste ano as achegas serán de ata 30.000 euros por entidade e a intensidade da axuda do 80% do custo subvencionable. Entre outras actuacións, con elas fináncianse, investimentos realizados entre o 1 de novembro de 2024 e o 31 de outubro de 2025 en equipamento informático, software, márketing, eficiencia enerxética, elementos de transporte, formación para os socios afiliados ao réxime de traballo autónomo (Reta) ou reformas que se realicen en calquera instalación do centro de traballo.
Desde que se puxo en marcha no ano 2012, este programa de asesoramento especializado leva beneficiado a máis de 2.000 empresas galegas, con máis de 3.000 servizos prestados e un orzamento executado de 14 millóns de euros