Celanova acolle tres concertos en setembro no Claustro Barroco e no Auditorio Ilduara
Celanova vivirá durante este mes de setembro unha axenda musical con tres propostas diferentes, repartidas entre dous dos espazos culturais máis destacados do municipio: o Claustro Barroco do Mosteiro de San Salvador e o Auditorio Municipal Ilduara.
O primeiro dos concertos terá lugar o sábado 19 de setembro no Claustro Barroco, onde actuarán Xabier Díaz xunto ás Adufeiras de Salitre. Unha semana despois, o 26 de setembro, este mesmo espazo acollerá a actuación 'Á Luz das Velas'.
Para asistir a calquera destas dúas citas, o público interesado pode adquirir as entradas na Oficina de Turismo de Celanova ou a través da páxina web ataquilla.com.
Esa mesma xornada do 26 de setembro, o Auditorio Municipal Ilduara será o escenario doutra proposta musical, neste caso protagonizada pola Banda A Lira, procedente de Ribadavia. A formación interpretará o repertorio co que participou no XIX Certame Galego de Bandas de Música.