Celanova reforzará a seguridade e a vixilancia nos núcleos máis afastados durante o verán
O subdelegado do Goberno en Ourense, Eladio Santos, e o alcalde de Celanova, Antonio Puga, copresidiron a Xunta Local de Seguridade na que se analizou a situación en materia de seguridade cidadá no municipio de cara a este ano, os casos de violencia de xénero e o Plan Director.
En canto á seguridade cidadá, os datos achegados pola Garda Civil amosan que tanto os delitos leves como os graves mantéñense estabilizados no concello e incluso se observa descenso nalgún parámetro. Como sinalou o subdelegado do Goberno ao respecto, “obsérvase unha estabilidade nos datos, que se traduce en seguridade para os veciños e veciñas”. Non obstante, destaca unha lixeira repunta en delitos vencellados coa ciberseguridade.
Ademais, na reunión tamén se planificou que neste 2025 se poña en marcha un dispositivo que incremente a vixilancia e a seguridade nos núcleos rurais máis illados, “para protexelos de posibles vagas de roubos, especialmente en tempada estival”, detallou Eladio Santos.
Así mesmo, o Concello de Celanova atópase en proceso de elaboración dun plan de emerxencias e evacuación de cara á celebración de eventos, principalmente para a Romería Raigame, que terá lugar como cada ano o 17 de maio en Vilanova dos Infantes.
Por último, en materia de violencia de xénero, dos 518 casos activos na provincia neste momento, 8 corresponden ao Concello de Celanova (dous de risco medio e 6 de risco baixo).
Ademais do subdelegado e o alcalde, tamén estiveron presentes representantes da Xunta de Galicia, Garda Civil e Policía Local de Celanova.