COGAMI forma a nove persoas da provincia de Ourense en transporte escolar e adaptado
COGAMI puxo en marcha un novo curso de Acompañamento en transporte escolar e adaptado no que participan nove persoas procedentes de diferentes concellos da provincia de Ourense. A iniciativa forma parte do programa 'Máis Emprego', orientado a mellorar as competencias de persoas con discapacidade ou incapacidade laboral e facilitar así o seu acceso ao mercado de traballo.
A formación impártese nas instalacións que a entidade ten na rúa da Farixa, na cidade de Ourense, e ten unha duración total de 75 horas: 50 horas de contido teórico e 25 horas de prácticas en empresas.
As prácticas levaranse a cabo coa colaboración de varias empresas do municipio ourensán, o que permitirá aos participantes coñecer de primeira man como funcionan os servizos de transporte escolar destinados a centros educativos, así como os de transporte adaptado para persoas con discapacidade ou mobilidade reducida, especialmente nos traxectos cara a centros de día.
Os nove alumnos que cursan esta formación proveñen dos concellos de Barbadás, Ourense, Taboadela, Piñor, Castrelo do Val e O Carballiño, o que reflicte a vontade da entidade de achegar estas oportunidades formativas a distintas zonas da provincia.
Dúas novas formacións en marcha
Ademais deste curso xa en funcionamento, 'Máis Emprego' —programa financiado pola Fundación "la Caixa" e o Fondo Social Europeo Plus— prevé desenvolver proximamente dúas novas accións formativas en Ourense, para as que aínda quedan as últimas prazas libres.
A primeira delas será un curso de Manexo de carretillas elevadoras, cunha duración de 12 horas, que terá lugar os días 19 e 20 de outubro.
A segunda será unha formación en Primeiros auxilios, cunha carga lectiva de 40 horas, que comezará o 26 de outubro. Este curso, ademais, é baremable de cara a procesos de selección de emprego público.
Desde COGAMI anímase ás persoas interesadas en apuntarse a estas formacións a poñerse en contacto coa entidade para coñecer os requisitos de acceso e completar a súa inscrición.