Coles acolle este sábado a segunda xornada de ‘Coles ao Vivo’ con tres concertos
O ciclo musical ‘Coles ao Vivo’ continúa este sábado, 16 de maio, no auditorio municipal coa celebración da súa segunda xornada, tras unha primeira cita que tivo lugar o pasado 9 de maio.
Naquela apertura do programa actuaron os grupos Faylinn Blues Rock e Amarillo Trece, dando inicio a unha iniciativa que converte a Coles nun punto de encontro para a música en directo durante este mes de maio.
A programación continúa este sábado a partir das 19:30 horas, cun novo cartel formado por Besbellos, Bushit e Ghostey, que serán os encargados de completar esta edición do ciclo.
As actuacións contan con entrada libre e forman parte dunha proposta musical que busca dinamizar a vida cultural do municipio, con grupos vinculados ao ámbito local.
Desde a organización destacan o ambiente e o carácter participativo destas sesións, pensadas para desfrutar da música en directo nun espazo aberto á veciñanza.