Comezan as obras de mellora da estrada OU-540 entre Celanova e Bande
A Xunta de Galicia deu comezo ás obras de mellora da estrada OU-540 no treito que une Celanova e Bande, unha actuación que suporá un investimento de 6 millóns de euros e que foi supervisada hoxe pola conselleira de Vivenda e Planificación de Infraestruturas, María Martínez Allegue.
Segundo explicou a conselleira, os traballos contan cun prazo de execución de 18 meses e permitirán transformar de maneira significativa esta vía ao longo de 14,1 quilómetros. O obxectivo principal da intervención é incrementar a capacidade da estrada, mellorar a seguridade viaria e optimizar a súa funcionalidade, nunha vía que conecta coa AG-31 (Ourense–Celanova) e que ten continuidade cara a Portugal.
As obras, que arrancan no municipio de Bande, céntranse inicialmente no treito con maior intensidade de tráfico, que atravesa os concellos de Celanova, Verea e Bande. Trátase, segundo destacou a conselleira, dunha actuación estratéxica para a comarca da Baixa Limia, xa que permitirá reforzar as comunicacións entre núcleos rurais e facilitar o acceso aos servizos na contorna.
O proxecto inclúe actuacións como a mellora do firme, a corrección de curvas e o redeseño de interseccións para adaptar a estrada ás necesidades actuais de circulación. O tramo no que se concentrará unha maior intensidade de traballos será o comprendido entre Agrelo e Bande Norte, onde se ampliará a plataforma con carrís adicionais de adiantamento, se mellorará unha intersección, se rectificarán curvas e se renovará a capa de rodaxe.
Ademais, están previstas a execución de sendas peonís en Agrelo e Carballo, así como a renovación de cunetas, a adecuación de accesos e a mellora da iluminación viaria nas zonas que o precisen.
A conselleira puxo en valor o esforzo técnico e financeiro da Xunta para reforzar a seguridade da rede viaria autonómica e lembrou que no que vai de ano se teñen investido máis de 50 millóns de euros en actuacións que abranguen preto de 500 quilómetros de estradas.