Convocado o Concurso de Escaparates de Nadal do Concello de Ourense
O Concello de Ourense convoca un ano máis o concurso de escaparates de Nadal nos establecementos comerciais do concello, que ten como obxectivo dar visibilidade e apoiar ao comercio local mentres se contribúe á mellora do ambiente de nadal na cidade.
O concurso deste ano está organizado polo Concello de Ourense en colaboración co CIFP Portovello e con Ecourense UTE, co fin de achegar ao alumnado á realidade comercial e promover a innovación educativa, á vez que se contribúe coa concienciación e mentalización medioambiental, a través da promoción da reciclaxe e do uso de materiais reciclados de diversa índole (papel, cartón, plástico, vidro, etc.) no marco das decoracións tradicionais do Nadal.
Poderán participar todos aqueles establecementos comerciais sitos no termo municipal do concello de Ourense que realicen os seus escaparates en torno á temática do nadal e, no caso de que algún establecemento comercial non dispoña de escaparate valorarase a decoración da fachada do local comercial. A decoración deberá ser realizada antes do día 13 de decembro.