Cudeiro estrea unha pasarela peonil de 54 metros sobre o rego Val dos Gozos
A nova pasarela peonil de Cudeiro xa está aberta á veciñanza tras finalizar os traballos executados polo Goberno autonómico na estrada OU-150. A infraestrutura, cunha lonxitude de 54 metros, discorre paralela á ponte sobre o rego Val dos Gozos e busca mellorar a seguridade dos desprazamentos a pé neste punto.
A conselleira de Vivenda e Planificación de Infraestruturas, María Martínez Allegue, visitou este sábado a actuación acompañada pola directora da Axencia Galega de Infraestruturas, María Deza. Os traballos para instalar a estrutura comezaran o pasado mes de maio.
A principal finalidade da pasarela é evitar que os peóns teñan que atravesar a ponte da OU-150, como sucedía ata agora, separando deste xeito os desprazamentos a pé da circulación de vehículos.
O Goberno autonómico destinou máis de 435.000 euros á execución da infraestrutura, que permite ademais conectar dous treitos da OU-150 que xa dispoñían dunha senda peonil e de beirarrúas. A actuación configura así un percorrido continuo para os peóns e elimina a interrupción que existía á altura do rego Val dos Gozos.
No deseño da nova estrutura empregáronse diferentes materiais, entre eles aceiro, madeira, formigón e pedra, coa intención de favorecer a súa integración na paisaxe da zona.
A intervención incluíu tamén a instalación dun sistema de iluminación na pasarela, unha medida destinada a incrementar a seguridade durante as horas con menor visibilidade e, ao mesmo tempo, poñer en valor a contorna.
Martínez Allegue destacou que actuacións destas características non só permiten avanzar cara a unha mobilidade peonil máis segura e sostible, senón que tamén poden favorecer outros usos do espazo. Segundo sinalou, estas infraestruturas "fomentan hábitos saudables, convidando a camiñar, facer deporte e descubrir a riqueza natural e patrimonial desta área".